Mar 6 | NdeIBE | STEP | UJesu wasuka lapho waya edolobheni lakibo, ehamba labafundi bakhe.

Mark 6

Umphrofethi Ongeladumo

1 UJesu wasuka lapho waya edolobheni lakibo, ehamba labafundi bakhe. 2 Kwathi ngeSabatha wafundisa esinagogini, abanengi abamuzwayo bamangala. “Indoda le yazithatha ngaphi izinto zonke lezi?” babuza. “Yinhlakanipho enganani le ayiphiwayo aze akwazi lokwenza imimangaliso!

3 Kanti angithi nguye yini umbazi lo? Kasindodana kaMariya yini le, umnewabo kaJakhobe, loJosefa, loJuda loSimoni? Odadewabo angithi bakhona khonapha?” Kwenza bamcaphukela lokho.

4 UJesu wathi kubo, “Umphrofethi kalalo udumo kuphela edolobheni lakibo, phakathi kwezihlobo zakhe lendlini yakwabo.” 5 Wayengeke enze izimangaliso lapho ngaphandle kokubeka izandla abalutshwana abantu abagulayo abasilise. 6 Njalo wamangaliswa yikuswela kwabo ukholo.

UJesu Uthumela Abalitshumi Lambili

UJesu wasenquma efundisa imizi ngemizi.

7 Wabiza abalitshumi lambili beza kuye, wabathumela ngababili wabapha amandla phezu kwemimoya emibi.

8 Imilayo yakhe yayiyile: “Lingathwali lutho kuloluhambo ngaphandle kwentonga – lingathwali sinkwa, mgodla loba yimali emabhantini enu. 9 Ligqoke amanyathela kodwa lingathwali elinye ijazi. 10 Lingaze lingene endlini ethile, hlalani khona lize lisuke kulelodolobho. 11 Nxa indawo ethile ingalamukeli ngesihle loba nxa ingalilaleli kalibothintitha uthuli ezinyaweni zenu nxa selisuka kuyo, kube yibufakazi lokubalahla.”

12 Basuka bahamba betshumayela ukuthi abantu kabaphenduke. 13 Bakhupha amadimoni amanengi, bagcoba abantu abanengi abagulayo ngamafutha babaphilisa.

UJohane Umbhaphathizi Uqunywa Ikhanda

14 Inkosi uHerodi yezwa ngalokhu, ngoba ibizo likaJesu laselisaziwa kakhulu. Abanye babesithi, “UJohane uMbhaphathizi uvukile kwabafileyo, yikho amandla amangalisayo esebenza kuye.”

15 Abanye bathi, “Ungu-Elija.” Kwabuye njalo abanye bathi, “Ungumphrofethi, njengomunye wabaphrofethi basendulo.”

16 Kodwa kwathi uHerodi ekuzwa lokhu wathi, “UJohane, indoda engayiquma ikhanda usevukile kwabafileyo!”

17 Ngoba uHerodi yena ngokwakhe wayekhuphe ilizwi lokuthi uJohane abanjwe, wathi kabotshwe aphoselwe entolongweni. Wakwenza lokho ngenxa kaHerodiya, umfazi womfowabo uFiliphi ayesemthethe. 18 Ngoba uJohane wayelokhu esithi kuHerodi, “Kakulunganga ukuthi uthathele umfowenu umfazi.” 19 Ngakho uHerodiya wahlala elesikhwili ngoJohane efuna ukumbulala. Kodwa waswela indlela yokumbulala,

20 ngokuba uHerodi wayemesaba uJohane emvikela, ngokumazi ukuthi wayeyindoda elungileyo njalo engcwele. Nxa wayemuzwa uJohane, wayedideka kakhulu, kodwa ethanda ukumlalela.

21 Ekucineni lafika elingaliyo. Mhla wesikhumbuzo selanga lakhe lokuzalwa uHerodi wenza idili lezikhulu zakhe labalawuli bempi kanye labakhokheli abaziwayo eGalile.

22 Kuthe indodakazi kaHerodiya isifikile yagida kamnandi yathokozisa uHerodi lezethekeli zakhe edilini. Inkosi yasisithi entombazaneni, “Ngicela loba yini, ngizakupha.”

23 Wamthembisa wafunga wathi, “Loba yini oyicelayo ngizakupha kungaze kube yingxenye yombuso wami.”

24 Yaphuma intombazana yayakuthi kunina, “Kambe ngiceleni?” Waphendula wathi, “Ikhanda likaJohane.”

25 Masinyane intombazana yatheleka enkosini isilesicelo leso, yathi: “Ngifuna ukuthi ungiphe khathesi nje ikhanda likaJohane lisemganwini.”

26 Inkosi yakhathazeka kakhulu, kodwa ngenxa yezifungo zayo langenxa yezethekeli zayo kayithandanga ukusala isicelo. 27 Ngakho yahle yathumela umbulali ukuba alethe ikhanda likaJohane. Yahamba indoda, yaliquma ikhanda likaJohane entolongweni, 28 yaliletha ikhanda lisemganwini. Inkosi yalethula entombazaneni, yona yalipha unina. 29 Bathi bekuzwa lokho abafundi bakaJohane beza bathatha isidumbu bayasingcwaba ethuneni.

UJesu Upha Izinkulungwane Ezinhlanu Ukudla

30 Abaphostoli babuthana kuJesu bambikela konke ababekwenzile labakufundisayo.

31 Kwathi ngoba kwakufika abantu abanengi kakhulu abanye besuka baze baswele ithuba lokudla, wathi kubo, “Ngilandelani lodwa siye endaweni ethuleyo ukuze liphumule.”

32 Yikho bahamba bebodwa ngesikepe baya endaweni esithekileyo. 33 Kodwa abanengi abababonayo besuka babananzelela babaxhuma begijima ngezinyawo bevela kuwo wonke amadolobho babaqalela ukuyafika.

34 UJesu wathi esehla esikepeni, ebona ixuku elikhulu labantu wabazwela isihawu ngoba babenjengezimvu ezingelamelusi. Ngakho wasebafundisa izinto ezinengi.

35 Ngalesi isikhathi kwasekusemini kakhulu, ngakho abafundi bakhe beza kuye bathi, “Le yindawo esesikhaleni, njalo sekusemini kakhulu. 36 Yekela abantu bahambe ukuze baziyele ezindaweni lasemizini bazithengele ukudla.”

37 Kodwa waphendula wathi, “Bapheni lina ukudla.” Bathi kuye, “Lokho kungathatha umholo wendoda owenyanga eziyisificamibili! Uthi sihambe siyochitha imali engako sithenge isinkwa sibaphe badle?”

38 Wabuza wathi, “Lilezinkwa ezingaki na? Ake liyokhangela.” Sebezibonile bathi, “Zinhlanu lezinhlanzi ezimbili.”

39 UJesu wasebalaya ukuthi bahlalise bonke abantu phansi etshanini ngamaxuku. 40 Yikho bahlala phansi ngamaxuku alikhulu. Abanye ngamatshumi amahlanu. 41 Wazithatha izinkwa zonhlanu lezinhlanzi zombili wakhangela ezulwini, wabonga, wazihlephula izinkwa. Waseziqhubela abafundi bakhe ukuba bazabele abantu. Waphinda wabehlukanisela izinhlanzi zombili. 42 Bonke badla basutha, 43 abafundi basebebutha imvuthu zezinkwa lezinhlanzi bagcwalisa izitsha ezilitshumi lambili. 44 Abadlayo babengamadoda azinkulungwane ezinhlanu.

UJesu Uhamba Phezu Kwamanzi

45 Masinyane uJesu wathi abafundi bakhe bangene esikepeni bahambe bamandulele eBethisayida, yena esavalelisana labantu.

46 Esehlukene labo waya entabeni wayakhuleka.

47 Kwathi sekuhlwile isikepe sasiphakathi laphakathi kwechibi, yena eyedwa emhlabathini. 48 Wabona abafundi begwedla ngamandla ngoba umoya wawuphikisana labo. Kwathi ngomlindo wesine webusuku waya kubo ehamba phezulu echibini. Wayengathi usesedlula kubo 49 kodwa bathi bembona ehamba phezu kwechibi bacabanga ukuthi lithongo. Bahlaba umkhosi 50 ngokuba bonke bambona besaba. Masinyane wabakhulumisa wathi, “Manini isibindi! Yimi. Lingesabi.” 51 Wasengena kubo esikepeni umoya wahle wathula. Bamangala kakhulu, 52 ngoba babengazwisisanga ngezinkwa; izinhliziyo zabo zazilukhuni.

53 Sebechaphile, bakhuphukela eGenesaretha bamisa khonapho. 54 Bonela ukuphuma esikepeni abantu bahle bamnanzelela uJesu.

55 Bagijima indawana yonke kulowommango bethwala abagulayo ngamacansi bebasa ngaphi langaphi lapho ayekhona. 56 Loba wayengaze aye ngaphi – emizini, emadolobheni loba emaphandleni – babeka abagulayo ezindaweni zokuthengisela. Bamncenga ukuthi abavumele bathinte nje umphetho wesigqoko sakhe, kwathi bonke labo abamthintayo basila.